Rorelna sangah Zofaten MP pathum?

Aizawl: Zohnahthlak inunauna ngaihtuah mi pakhat chuan tun tum Lok Sabha MP thlanna neih tur hi tlang hrang atangin a thlir a, chu a thlirna tlang atang chuan inthlan lo awm tur a hmuah dan hi a hahdam hle thung. "Mizoram atang chuan Mizo MP kan nei dawn chiang a, Bangalore Central-ah Congress ticket chu HT Sangliana’n a chang a, Outer Manipur-ah Congress ticket changtu chu Thangso Baite a ni a, ani bakah hian NCP candidate chu LB Sona a ni bawk a, anni hi Outer Manipur biala tlin beiseiawm an ni a, an tlin vaih chuan Zofaten India ram rorelna sangah MP pathum kan nei thei," tiin a sawi. He a ngaihdan hi kan tawmpui emaw, tawmpui loh ngawt chi pawh niin a lang hek lo, Zohnahthlak tan MP pathum neih theihna ‘chance’ a awm a, chu chu thil thleng zen zen lah a ni hek lo.

Nimin lawka Aizawl Sipai Lammuala Congress mipui 1,000 vel pungkhawm hmaa ‘chibai’ tia mipui hmaa thusawi bul tantu Rahul Gandhi chuan Tuibong Peace Ground, Churachandpur-ah ‘chibai’ ti bawkin Kuki-Chin-Mizo pungkhawmte rilru a hneh a, Thangso Baite tan Rahul a campaign. Outer Manipur Congress MP candidate Thangso Baite hi Zou emaw, Paite emaw inchhal tura ngaih a ni a, chutah a khingpui Zohnahthlak tho NCP candidate LB Sona hi Paite a ni bawk. Hemite pahnih hian Outer Manipur-a mihring ngah em em Naga hnam an khing dawn. Zohnahthlak hi an tanho loh fo avangin Naga hian Outer Manipur hi an la chawk.
Kum 1967 khan Zohnahthlak Independent P. Haokip chuan Outer Manipur MP nihna hi a lo hauh tawh a, a term lehah INC candidate Zohnahthlak tho Paokai chu thlan tlin a ni ve thung, 1980 khan Gouzagin chuan MP nihna hauh lehin heta tanga 1996 thleng hian Naga kutah Outer Manipur hi a awm leh ta a, 1998 khan CPI candidate Kim Gangte chu MP-ah thlan tlin a ni leh ta nawlh a, 1999 khan Zohnahthlak tho NCP candidate Holkhomang thlantlin a ni ve leh thung, tuna MP ni mek erawh Naga hnam niin Mani Charenamei a ni.
Outer Manipur, Manipur thingtlangram MP bialah hian Meitei tan in candidate theih a ni ve lo a, tun tumah hian candidate hi pakua lai an awm a, chungte chu L B Sona (NCP), L Adani (BJP), Thangso Baite (Congress), M Yamkhongam (RJD), Thang Khagin (LJP), Mani Cheranamei (People’s Democratic Alliance) leh independents Valley Rose, Rose Mangsi Haokip leh Lamlalmoi Gangte an ni a. Zohnahthlak zingah hian candidate hi an awm nual a, beiseiawm deuh erawh pahnih vel chauh hi an ni. Naga mi, he biala MP ni lai PDA candidate Mani Cheranamei hi tawhkhirh pawl tak ni tura ngaih a ni. "Zohnahthlakte hi tangho thiam ila chuan MP-ah hian kan tling fo thei ang…" tiin an sawi thin.
Manipur hian MP hi pahnih an nei thei a, Outer leh Inner Manipur tiin bial an then a, Inner hi Manipur khawpui Imphal leh a chhehvel a ni a, hei hi Meitei biala ngaih a ni thin.
Kum 2004 khan Bangalore North bial atangin Mizo pa ngei mai chu MP atan rawn thlan tlin nawlh a ni a, HT Sangliana khan a khingpui Congress veteran C.K. Jaffer Sharief chu BJP ticket hmangin a paihthla a, Lok Sabha-ah Zohnahthlak MP pahnih an awm phah.
Kum 2008 July thlaa Indo-US nuclear deal a thlawp avanga BJP lamin an ensan tak HT Sangliana chuan Bangalore Central, vote maktaduai 1.9 lai awmna chu Congress ticket hmangin a chang leh thei ta cheu.
"Pathianin min pui ang a, pathian miten min vote ang , chumi avanga hnehna ka neih chu zaah zain ka ring," tiin a sawi nghe nghe. Kum 36 chhung ngawt police officer hna lo chelh tawh hian a bial tharah hian Janata Dal(Secular) B.Z. Zameer Ahmed Khan leh BJP candidate buk rit tak tur P.C. Mohan a khing dawn. Bangalore bial chu nasa taka sawi danglam a ni a, Bangalore Central hi bial thar a ni, kum 2008 MLA inthlanah khan he bial MLA 28 awm theihnaah hian BJP chuan seat 17 ngawt an hauh thei, chu chu ‘majority’ a ni. HT Sangliana hian a huphurh lo hle thung, Congress ticket a chan theihna chhan chu UPA lama trust vote a pek vang a nih loh thu a sawi nghe nghe.
India ram rorelna sang Lok Sabha-ah hian member hi 543 an awm a, chung zingah chuan tihfuh chuan Zohnahthlak pathum chu tel ve thei dinhmunah a ding tihna a nih tak chu. (Courtesy Evening Post)