Mizoram plan sum 30%-in pun beisei

Aizawl, March 2: Sawrkar thar a piang a, sawrkar kum thar (April 2009-March 2010) budget pawh a punna a sang dawn hle niin Mizoram Planning Commission vice chairman Lalkhama (IAS) retired chuan a sawi a, plan sum punna hi official level-a hriat chinah chuan zaa 25 a nih theih tur thu a sawi.

Kum 2008-2009 financial year chhung atana hman tur, annual plan kha a hun laia chief minister leh finance minister ni bawk Zoramthanga chuan cheng vaibelchhe 1,000 a pharh a, hei hi kum 2007-2008 nena tehkhin chuan a punna hi 17% a ni a, kumina a punna tur hi a sang hle dawn niin a lang.
"Tun hnaia central lama official zuk kalten thu an rawn hawn dan chuan planning commission chuan Mizoram 2009-2010 annual plan hi 25% velin a pung dawn a, chumi awmzia chu kum hmasa annual plan cheng vaibelchhe 1,000 chu sawrkar kum tharah hi chuan cheng vaibelchhe 1,250 a ni thei dawn tihna a ni a, a punna chu valbelchhe 250 a nih beisei a ni," tiin Lalkhama chuan Evening Post a hrilh.
Mizoram state planning commission vice chairman chuan sawi chhunzawmin chief minister hian plan sum hi a la final rih lo tih a sawi a, a final hunah chuan plan sum hi a sang leh duai dawn niin a sawi a, "annual plan hi cm-in a final hunah chuan 30% laite pawhin a pun beisei a ni," tiin a sawi. 30%-a annual plan sum hi a pung a nih chuan sawrkar kum thar 2009-2010 chhunga Mizoram plan sum punna tur chu cheng vaibelchhe 300 vel a ni dawn a ni.
Plan sum pun chhan hi sawrkar tharin New Land Use Policy (NLUP) a tharthawh vang a ni thei em tih zawhna chu chhangin, "NLUP vang hi a ni deuh bawk a, NLUP hi sawrkar laipui lam pawhin an hlut hle a, environment protection a ni tel nghal bawk a, hei hi khawvel kal dan pawh a ni," tiin NLUP vanga plan sum hi pung a nih theih thu Lalkhama chuan a sawi.
Hemi chungchangah hian Evening Post chuan Agriculture etc. changtu minister H Liansailova chu a lo bepawp tawh a, ani pawh hian NLUP vang hian department hrang hrang plan chu a pun theih tur thu lo sawi tawhin, "|henkhat chuan 30% ten an tih pun a ngai a, a \hen chuan 50% ten an tihpun a ngai," tiin a sawi a, NLUP chu budget-a awm tur a nih avangin plan sum pawh hi a pun phah niin a ngaih theih.
Mizoram state planning commission vice chairman chuan sawrkar tharah beiseina thar a neih thu a sawi a, "Fiscal management lamah pawh hma kan sawn tehreng ang, tumna goodwill \ha tak neia ti an ni a, tunhma ai chuan kan kal \hat ka ring a lawm," tiin a sawi.
Kum hmasa lama India hmarchhak state annual plan sum punna a inthlau hle a, Tripura state plan sum a pun miah loh laiin Arunachal Pradesh plan sum punna chu 56.44% a ni a, Assam chu 31% a ni thung.
Annual plan sum pung hi Mizoram tan thil lawmawm a nih leh nih loh chungchangah Pachhunga University College Economics department Lecturer Lalthlamuana Ralte chu Evening Post-in a be pawp a, Muantea chuan, "He thil hi a lawmawm emaw, lawmawm lo a ni thei. Annual plan sum punna pawisa hi khawi a\angin nge kan dawn tih hi a pawimawh lai ber chu a ni dawn a. Tunah hian kan state plan sum hi 30% velin a pung a nih chuan central assistance emaw, Mizoram state tana India sawrkain pawisa min puk sak a\anga pung a ni thei," tiin a sawi a, "Central assistance vanga plan sum hi a pun chuan a lawmawm a, mahse chuti ni lova pawisa kan puk avanga annual plan hi pung anih chuan a lawmawm lem loh, chu ai chuan ba neih belh loa 10% vela pun dan ngaia pun hi a lawmawm mah zawk," tiin sawi.
Economics lama mi thiamte chuan annual plan hi kum tin 10-15% vel hian a pung ve hrim hrim niin an sawi a, 30%-a state annual plan sum a pung a nih chuan leiba a pung emaw, central lam \anpuina vang emaw a ni thei niin an sawi.
Central sawrkarin 2009-2010 atana interim budget a pharhah chuan plan-a hmanral tura a riruat chhin zat chu cheng vaibelchhe 2,85,149 a ni a, non-plan atan cheng vaibelchhe 6,68,082 a ni thung. National Rural Employment Guarantee Scheme (NREGS) atan kum 2009-2010 chhunga an dah zat chu cheng vaibelchhe 30,100 a ni a, SSA hnuaiah mihring chenna zaa 98 chu khung vek tum a ni a, agriculture lamah nasa taka \an lak tum a ni bawk.
Sawrkar kum thar 2009-2010 hian kumin April thla tir a\anga 2010 March ni 31 thleng a huam dawn a, tuna kan rawn tarlan sumte khi hemi hun chhunga hmanral zat tur hi a ni. (Courtesy Evening Post)