Aizawl bomb kum 43-na ‘Zoram Ni’

Aizawl, March 5: Zawl khawpuiin senmei a chan ni kha kum 1966 March ni 5 kha a ni a, kumin hi a tum 43-na a ni ta a, kum 41 a liam hnu, a kum 42-naah khan Zoram Ni chu a vawikhatna atan Aizawl Vana Pa Hall-ah hman a ni a, kumin hian a tum hnihna chu Mizo Zirlai Pawl (MZP) huaihawtin hman a ni leh ta.

Hnam sipaite chuan kum 1966 March ni 1 khan Zoram independent an puang a, khami tum khan Zoram hmun hrang hrangah sipai hmunte chu an hualchep a, Aizawl ngeiah pawh Assam Rifles chu tui in tur pawh nei lo khawpin an hual chep tawh a ni. India sawrkar chuan kha thil thleng kha an ngawihbopui mai mai lo a, Tezpur Assam atangin thlawhna pali ngawt an rawn tir a, chung thlawhna chuan Aizawl khawpui leh Mizoram khaw hrang hrangte chu bomb hmangin a bei ta chiam mai a, hei hi India rama mahni khua leh tuite bomb hmanga beih hmasak ber leh awmchhun a ni.
Hunter leh Toofani thlawhna hmangin Aizawl khawpui chu civil mi leh Hnam sipai thliarhrang miah lovin an rawn bei a, he beihnaah hian a zirchiangtu historian Dr JV Hluna chuan thi hi 13 vel thleng a finfiah thei tawh a, he ni hi Mizoramin a tawnah chuan ni rapthlak ber tiin a sawi hial.
Dawrpui pheite chu nasa takin a kang a, India Airforce chuan mahni khua leh tuite ngei mai chu nasa takin dimna awm miah lovin a bei a, Mizoram khawpui chu a kang hluah hluaha nu nau mangangin khawpui an tlanchhiatsan nasa hle.
Nasa taka Mizoram beih a nih hnu hian a hun laia India ram prime minister Indira Gandhi chuan he thil thleng hi a zep tlat a, media lamin an kawm pawhin, "ration kan thlak" tiin a sawi a, Khasi MP-ten Aizawl rawn tlawhin anni hian bomb kang bangte chu kengin Delhi lamah hian Mizo thlavang an zuk hauh nghe nghe niin Dr JV Hluna chuan a lo ziak tawh a ni.
Mizoramin nasa taka India Airforce kut a tawrh lai hian Indira Gandhi hian Mizoram mipuite aiin a rama chauh hi a duh niin sawi a awm nghe nghe a, amaherawhchu khatih hun laia thil thleng ‘evidence’ kha khawi hmunahmah hmuh tur a awm lo a, thlalak emaw, record emaw a awm lo.
Jet fighter hmanga Aizawl beih chungchang hi Mizo zingah sawichhuah a tlem hle a, kum 2007 khan Dr JV Hluna chuan hemi chungchang a chhui chianna paper chu a tichhuak a, heta tang hian journalist beng thlengin english paper Newslink chuan a rawn ziak a, hemi hnu lawk hian Pathianni chhuak Zalen-ah tarlan niin Zozam Weekly leh chanchinbu hrang hrangah thailan a ni chho ta a. Zozam weekly chuan jet fighter beihna tuartute an office lama in report turin hman an la a, report pawh an dawng nual a ni.
Kum 2008 khan Mizo Zirlai Pawl lam chuan jet fighter hmanga Zoram beih ni chu hriatrengna hman thain an hre ta a, nikum khan Zoram beihna lam veitu Zoram Ni Organising Committee nen thuhovin March ni 5 khan Vana Pa Hall-ah a vawikhatna atan Zoram Ni hi hman a ni ta nghe nghe a ni. Kumin hian Zoram Ni hi I&PR hall-ah vawiin hian hman a ni leh a, Mizoram Journalist Association (MJA) president K Sapdanga chu khuallian niin he hun hi MZP te huaihawta hman a ni.