EXIM bank-in Mizoram thlithlai

(Maruata a nu nen)
Aizawl, Mar 19 : Export-Import Bank of India, Mumbai Chief Manager Vanlalruata Fanai chuan tunlai hian Mizoramah product hrang hrang khawvel ram danga thawnchhuah theih tur a awm leh awm loh a rawn thlithlai mek.

"Hmanni lawka Vietnam-a Mizoram trade & commerce minister Lalrinliana Sailo, Secretary Esther-i leh Joseph L Ralte te an kal rahchhuah kha a ni a. Kan bank aiawha kal chuan kan chairman hnenah Mizoram dinhmun hi a lo thlen a, kei hi handicraft, horticulture leh agriculture product thawnchhuah tur a awm dawn leh dawn loh survey turin min rawn tir ta a ni," tiin Vanlalruata Fanai chuan Evening Post a hrilh.
"India ram pawna thawnchhuah tur a awm em tiin tunah hian zirchianna ka rawn nei a ni," tiin a sawi a, Mizoram Entreprenuership Network (MEN) Genral Secretary Joseph L Ralte leh Treasurer Daniel Hauhnar ten Vanlalruata hi tawiawmin Mizoram Iskut Growers Assiocation, Anthurium Society hotute kawmna a nei tawh a, trade & commerce minister leh secretary te a hmu bawk.
Mizoram tana a tangkai theihna sawiin, "Mizo awmchhun ka ni mai a, thahnem pawh ka ngai, tunah hian market kan zawnpui thei a, export-tu turte pawh a hmuna rawn enfiahin pawisa hmang pawhin kan pui thei a ni," tiin a tangkai theih tur thu Vanlalruata chuan a sawi bawk.
Exim bank tia kan hriat lar Export-Import Bank of India hi financing institution-ah chuan a apex body a ni a, India sawrkar ta niin India ram atanga product hrang hrang thawnchhuahpuitu an ni. (Courtesy Evening Post)