Phaiah Mizo tlangval an che buai

Aizawl, May 4 : Hyderabad khawpuia Mizoram atanga thalai rual hnathawk tura an thawn thlakte chuan harsatna nasa tak an tawk niin Hyderabad Mizo Zirlai te hnen atanga thu dawn a ni, anmahni thawnthlatu nia tarlan Juliet-i erawh Evening Post hian a bepawp thei lo thung.

"Hman deuh khan Mizo thalai thenkhat chu pawisa engemaw zat deposit tir an nih hnuah security guard turin lak an ni. Hyderabad hmunah an rawn thawn a, an beisei ang an hmu lova, chenna mumal an nei lova, an hotute nen intih thiam loh nasa tak an neih hnuah a then phei chu na takin an sawisa a, a then phei chu phuar betin inchhungah an kalhkhum nghe nghe a. Hyderabad Mizo Association ten theihtawp an chhuah hnuah an chhanchhuak thei hram a ni. Aizawl chanchinbu thenkhatah press release hial siamin fimkhur a tul zia an tarlang a.
Vawiin lamah ka beisei loh lutukin phone ka dawng a, Mizo harsatna nei an awm thu a ni. Mizo mi engemaw zat Mizoram atangin rawn thawn leh an ni. Anmahni ruaitu leh buaipuitu hi hi Juliet niin an sawi. Juliet-i biak pawh tum pawhin a biak theih lova. Pawisa erawh chu deposit a awm hran lova, mahse harsa ve tak tak te an nih avangin pawisa puk chawpa rawn kalte an ni. Mizoram lamah an duty-na tur hmun hi Building nalh leh ropui tak tak an lo hmuh tir a, an hlawh pawh cheng 5,000 anih hnuah kaichho zel tura hrilh an ni. Mahse, Hyd an rawn thlen hnu hian an beisei ang a ni ta meuh lo a ni. Awmna mumal tak an nei mang bawk silova, duty turin a then chu an lo kal lo zeuh zeuh a ni awm e. Tichuan, vawiin lam khan mi 6 chu an hotuten an thawmhnaw nen an lo vawmchhuak tawp mai a ni. Kalna tur an nei lova, pawisa hman tur mumal an nei hek lo.
Mizo tlawmngai ten an awmna tur an ngaihtuah pui a, an chhungte pawisa nghakin haw an tum mek a ni. Hetiang hi kan tawng ngun ta hle. Awareness mumal zawk hi kan nei har ta hle. Engmah hriat chianna nei hmasa lova, phai lama hna zawn kawngah inzirtirna ka mamawh ta hle mai a. Unskilled labour tan phei chuan, Mizorama chhuahsan hi a him ber em aw?" (Courtesy Evening Post)