Governor Hovin Rashtriya Sainik Board Thukhawm

Nimin khan Mizoram Rajya Sainik Board inkhawm vawi 12-na chu an President Mizoram Governor hovin Raj Bhawan Conference Hall-ah neih a ni a, Board Vice-President Chief Minister Pu Lal Thanhawla leh Board Ex-Officio member Home Minister Pu R.Lalzirliana bakah memebr dang an tel kim.

Meeting thuhma sawiin Board President Mizoram larsap chuan sipai bangte leh an chhung leh khat hamthatna tura hma lakna hrang hrang a tarlang a. Indopui II-na tuartu (World War Veterans) leh indonaa sipai thite nupui (War Widows) mi 1360-te chu chhawm-dawlna tangkafai cheng nuai 133 sem an ni, a ti a. Nikum Armed Forces Day puala thawhlawm khawnah Rs.92,078 hmuh a nih thu leh Vijay Diwas/Ex-Servicemen Reunion Rally pawh neih a ni thu a sawi. Sipai bangte tan bik hriselna lama inenkawlna tur ram pum huapa April 2003 atanga beihpui thlak pawh Mizoramah chak taka kalpui a ni a ti a. he Scheme hnuaiah hian sipai bang leh an chhungkhat mi 1177 an inziak lut tawh a ni a ti. Defence Minister’s Discretionary Fund atangin sipai bang leh hmeithaite chu cheng nuai 74.10 tanpuina sem a ni tawh a. Sipai bang la valai tak tak mi 22 Mizoram 5th IR Battalion-ah lak an ni a ti.
Nimina inkhawm chuan thil chi hrang hrang engemawzat an rel a. Chung zingah chuan Gallantry Cash Award te, Indopui II-na kaihhnawihho tanpuina sum dil belh te, sipa thihsan hmeithai leh sipai inhliamte tana ex-gratia tihpun rawtna te, Champhai leh Kolasib-a Sainik Office hawn chungchang te, Mizorama Sainik School din tur chungchang leh Mizoram sorkar hnuaia Territorial Army Battalion (home & hearth) din tur chung-chang te a tel.
Ex-Servicemen hamthatna tur an sawiho bawhzui hian Board Vice-President Chief Minister Pu Lal Thanhawla chuan Kargil indona hmasa bera nunna chan ta Ex-Sepoy Rohmingliana farnu Zo-thansangi chu Police Department hnuaia Grade- IV hna pe turin a hriattir nghal a.Kum 2004-a inkahna atanga ramtui leilo Ex-Sepoy Zonunmawia unaupa Zoram-sanga pawh Police Department-ah bawk driver hna pe nghal turin Chief Minister hian a hriattir bawk. (Courtesy Mizo Aw)